यस वर्षको धरान रन माघ २३ मा हुने रजिस्ट्रेसन खुल्ला

विष्फोट न्युज 
धरान,१४ कार्तिकः धरानमा आयोजना हुदै आएको नेपाल कै सवैभन्दा ठुलो दौड प्रतियोगिताको रुपमा रहेको धरान–१० के रन नेवाः च्यारेटी २०२७ का लागि आवेदन खुल्ला भएको आयोजकले जनाएको छ ।

आयोजकले शनिवार पत्रकार सम्मेलन गरी दिएको जानकारी अनुसार माघ २३ गते आयोजना हुने १५ औँ संस्करणको ‘धरान १० के रन–नेवा च्यारेटी २०२७’ का लागि दर्ता खुल्ला गरिएको जनाएको हो ।

यस संस्करणमा दर्ताका लागि तीन चरणको शुल्क निर्धारण गरिएको आयोजकले जानकारी गराएको छ ।

कति छ दर्ता शुल्क ?

आयोजकले दिएको जानकारी अनुसार अर्ली वर्ड रजिस्ट्रेसन अन्तर्गत कात्तिक १ देखि मंसिर १४ गतेसम्म दर्ता गर्नेले ४ सय रुपैयाँ तिर्नुपर्नेछ भने  नियमित दर्ता अन्तर्गत मंसिर १५ देखि पुस ३० गतेसम्म ५ सय रुपैयाँ शुल्क लाग्नेछ। यता माघ १ देखि १५ गतेसम्म दर्ता गर्नेले ७ सय ५० रुपैयाँ तिर्नुपर्नेछ। १३ वर्षमुनिका बालबालिकाका लागि भने कात्तिक १ देखि माघ १५ गतेसम्म ४ सय रुपैयाँ दर्ता शुल्क तोकिएको छ।

‘शिक्षाका लागि दौड’नारासहित आयोजना हुने प्रतियोगितामा खुला विधातर्फ प्रथम हुने महिला तथा पुरुष धावकले जनही ६० हजार रुपैयाँ पुरस्कार प्राप्त गर्नेछन्। दोस्रो हुनेले ४० हजार र तेस्रो हुनेले ३० हजार रुपैयाँ पाउने आयोजकले जनाएको छ।

त्यस्तै, १३ वर्षमुनि र १२ देखि १५ वर्ष उमेर समूहका महिला तथा पुरुषतर्फ प्रथम, दोस्रो र तेस्रो हुनेलाई क्रमशः ७ हजार, ५ हजार र ३ हजार रुपैयाँ पुरस्कार दिइनेछ।

४० देखि ४९ वर्ष उमेर समूहको भेट्रान विधामा प्रथम, दोस्रो र तेस्रो हुनेलाई क्रमशः १० हजार, ७ हजार र ५ हजार रुपैयाँ प्रदान गरिनेछ।

५० देखि ५९ वर्ष उमेर समूहको मीड भेट्रान विधामा क्रमशः ७ हजार, ५ हजार र ३ हजार रुपैयाँ पुरस्कारको व्यवस्था गरिएको छ।

६० वर्षमाथिको सुपर भेट्रान विधामा प्रथम हुने महिला तथा पुरुष धावकलाई जनही ५ हजार रुपैयाँ प्रदान गरिने आयोजकले जनाएको छ।निर्धारित समयभित्र दौड पूरा गर्ने सहभागीलाई मेडल, जुस तथा पानी उपलब्ध गराइनेछ।

आयोजकका अनुसार सिनियरतर्फ उत्कृष्ट २ हजार र जुनियरतर्फ उत्कृष्ट ९ सय धावकलाई मेडल प्रदान गरिनेछ।
धरानका स्थानीय धावक धाविकालाई प्रोत्साहन गर्न छुट्टै आकर्षक पुरस्कारको व्यवस्था गरिनेछ।

प्रतियोगितामा ह्विलचियर रेससमेत आयोजना गरिनेछ। दौडका क्रममा गम्भीर चोटपटक लागेमा एक लाख रुपैयाँसम्मको उपचार बिमाको व्यवस्था गरिएको आयोजकले जनाएको छ। धावकको समय मापन गर्न चिप टाइमिङ प्रणाली प्रयोग गरिनेछ। प्रतियोगिता बिहान ७ः३० बजे धरानको भानुचोकबाट सुरु हुनेछ।

प्रतियोगिता पुतली लाइनबाट सुरु भई देशी लाइन, पुरानो बजार, पिण्डेश्वर मन्दिर, विजयपुर चोक, हात्तीसार क्याम्पस, रेडक्रस भवन,अमरहाट,कभर्ड हल,जिरो पोइन्ट,जानकी चोक, धरान रङ्गशाला, गणेशमान चोक,पानीट्यांकी, कल्याण चोक,मङ्गलवारे,रत्न चोक,बुद्ध चोक,दुर्गा चोक,पुतली लाईन हुँदै भानुचोकमा पुगेर समापन हुने आयोजकले जनाएको छ।आयोजकले  प्रतियोगितालाई सफल बनाउन नगरवासी,सङ्घसंस्था तथा सरोकारवालासँग सहयोगको अपिल समेत गरेको छ ।

यस वर्ष ५ हजार भन्दा वढी धावक धाविकाहरुले सहभागीता जनाउने विश्वास गरीएको आयोजक समितिका अध्यक्ष हेमन सुनुवारको भनाई रहेको छ ।

प्रतियोगिताबाट सङ्कलित रकम नेवा एजुकेसन फन्डमा थप गरी सामुदायिक विद्यालयका विपन्न तथा जेहेन्दार विद्यार्थीलाई छात्रवृत्ति प्रदान गरिनेछ।

धरान रन समूहले विगतदेखि नै प्रतियोगिताबाट सङ्कलित रकम शिक्षा तथा सामाजिक सेवामा खर्च गर्दै आएको जनाएको छ।हरेक वर्ष फन्टबाट संकलन भएको रकम गरीव तथा जेहेन्दार विद्यार्थीहरुका लागि छात्रवृत्ति वितरण गरीदै आएको संस्थाका अध्यक्ष हेमन सुनुवारले जानकारी दिएकाछन् ।