धरान नोवेल कलेजको स्वागत कार्यक्रम सम्पन्न

विष्फोट न्युज 

धरान,२१ भाद्रः धरान नोभेल कलेज, धरान–१२ ले कक्षा ११ मा अध्ययनरत नयाँ विद्यार्थीलाई स्वागत कार्यक्रम सम्पन्न गरेको छ ।

नयाँ शैक्षिक सत्रमा कलेजमा भर्ना भएका विद्यार्थीहरूलाई औपचारिक रूपमा स्वागत गर्दै उनीहरूलाई कलेजको शैक्षिक वातावरण, गतिविधि तथा आगामी अध्ययन यात्राबारे जानकारी गराउने उद्देश्यले कार्यक्रम आयोजना गरिएको हो।

कार्यक्रममा कलेजका निर्देशक सोभित यादवले धरान नोभेल कलेजको शैक्षिक गतिविधि, उद्देश्य, अध्ययन–अध्यापनको वातावरण तथा कलेजले विद्यार्थीको उज्ज्वल भविष्य निर्माणका लागि गर्दै आएका विभिन्न प्रयासबारे जानकारी गराएका थिए।

उनले विद्यार्थीलाई गुणस्तरीय शिक्षा प्रदान गर्नुका साथै उनीहरूको क्षमता, प्रतिभा र व्यक्तित्व विकासमा समेत कलेजले प्राथमिकता दिँदै आएको बताए।

निर्देशक यादवले कलेजले विद्यार्थीको शैक्षिक गुणस्तर अभिवृद्धिका लागि विभिन्न गतिविधि सञ्चालन गर्दै आएको जानकारी गराउँदै विद्यार्थीको क्षमता र रुचिअनुसारको वातावरण निर्माण गर्न कलेज प्रतिबद्ध रहेको बताए।

उनले नयाँ विद्यार्थीलाई कलेजको शैक्षिक परिवारमा स्वागत गर्दै आगामी दिनमा शिक्षक, विद्यार्थी र अभिभावकबीचको सहकार्यलाई अझ प्रभावकारी बनाउँदै लैजाने बताए।

कार्यक्रमका प्रमुख अतिथि कार्यवाहक मेयर अईन्द्र विक्रम बेघाले धरान शैक्षिक हवको रुपमा रहेको र त्यसलई थप विकास र विस्तार गर्नको लागि धरान नगरपालिका लागि रहेको वताए ।

विद्यार्थीको सफल भविष्यका लागि गुणस्तरीय शिक्षा र अनुशासन महत्वपूर्ण रहेको बताउदै विद्यार्थी जीवनलाई भविष्य निर्माणको महत्वपूर्ण चरणका रूपमा लिँदै अध्ययनमा निरन्तर मेहनत, लगनशीलता र अनुशासन कायम गर्न आग्रह गरे। उनले विद्यार्थीलाई अध्ययनसँगै सामाजिक जिम्मेवारी र सकारात्मक सोचका साथ अघि बढ्न आग्रह गर्दै आफ्नो ज्ञान र सीपलाई समाजको हितमा प्रयोग गर्नुपर्नेमा जोड दिए।

मेयर बेघाले शिक्षाले व्यक्तिको व्यक्तिगत विकाससँगै समाज र राष्ट्रको समग्र विकासमा महत्वपूर्ण भूमिका खेल्ने उल्लेख गर्दै विद्यार्थीलाई अवसरको सदुपयोग गर्न आग्रह गरे। नयाँ विद्यार्थीहरूलाई स्वागत गर्दै उनले उनीहरूको शैक्षिक यात्रा सफल र उपलब्धिमूलक रहोस् भन्ने शुभकामना समेत व्यक्त गरे।

त्यस्तै, विशेष अतिथि वडा नं। १६ का वडाध्यक्ष मुरारी भट्टराईले विद्यार्थीको शैक्षिक विकासमा कलेज तथा शिक्षक–अभिभावकको महत्वपूर्ण भूमिका रहने उल्लेख गरे। उनले विद्यार्थीले कलेजमा प्राप्त गर्ने ज्ञान र सीपलाई व्यवहारमा उतार्दै आफ्नो भविष्य निर्माणमा केन्द्रित हुन सुझाव दिएका थिए ।

उनले नयाँ विद्यार्थीलाई सफल शैक्षिक यात्राका लागि शुभकामना व्यक्त गर्दै अध्ययनका क्रममा आउने चुनौतीलाई आत्मविश्वासका साथ सामना गर्न आग्रह गरे।

कार्यक्रमको अध्यक्षता कलेजका अध्यक्ष डाक्टर मोहन पोखरेलले गरेका थिए भने कार्यक्रमको सञ्चालन मणि राईले गरेका थिए। 

स्वागत कार्यक्रमले नयाँ विद्यार्थीलाई कलेजको वातावरणसँग परिचित गराउँदै उनीहरूमा आपसी सद्भाव, उत्साह र शैक्षिक यात्राप्रति सकारात्मक ऊर्जा प्रदान गरेको कलेजका सञ्चालक मणि राईले बताए ।

कार्यक्रममा विद्यार्थीहरूले नयाँ शैक्षिक यात्रालाई उत्साहका साथ अघि बढाउने प्रतिबद्धता व्यक्त गरेका थिए।

मिस्टर फ्रेसर र मिस फ्रेसरमा श्रेष्ठ र राई छनौट

कलेजले यस वर्षको मिस्टर फ्रेसरका लागि कम्प्युटर साइन्सका विद्यार्थी रिवाज श्रेष्ठ छनौट भएका छन् भने मिस फ्रेसरमा साइन्स बायोकी युनिया राई चयन भएको कलेजले जनाएको छ ।

कलेजका विद्यार्थी मध्ये पढाई,अनुशासन र अन्य अतिरिक्त क्रियाकलापको आधारमा यो चयन गरीएको कलेजले जानकारी दिएको छ ।